Stærsta fíkniefnamál ársins: Úrskurðaður í 4 vikna gæsluvarðhald

Héraðsdómur Reykjavíkur úrskurðaði í dag karlmann á sextugsaldri, sem grunaður er um að hafa staðið að innflutningi í umfangsmesta fíkniefnamáli ársins, í fjögurra vikna áframhaldandi gæsluvarðhalds. Maðurinn hefur áfrýjað úrskurðinum til Hæstaréttar en hann hefur setið í gæsluvarðhaldi síðustu vikur.

Hann er starfsmaður lítils fyrirtækis hér á landi sem fíkniefnapakki, sem innihélt mikið magn af e-töflum og einnig kókaín, amfetamín og stera, var sendur á í október síðastliðnum. Maðurinn hefur aldrei komið við sögu lögreglu áður og herma heimildir fréttastofu að hann telji sig hafa verið svikinn í málinu. Hann hafi einungis verið beðinn um að koma pakka sem innihéldi stera hingað til lands. Og hafi því ekki haft hugmynd um hið mikla magn fíkniefna.

Rannsókn lögreglu er afar umfangsmikil og mikil vinna að baki, sem hefur staðið yfir um nokkra vikna skeið. Lögreglan hefur unnið verkefnið í samvinnu við tollgæsluna. Friðrik Smári Björgvinsson, yfirlögregluþjónn, sagði í samtali við fréttastofu í gær að rannsóknin myndi ganga ágætlega.