Björgunsveit á leið upp á Þröskulda að aðstoða ökumann

Björgunarsveitarmenn frá Hólmavík eru nú á leið upp á Þröskulda á milli Reykhólasveitar og Steingrímsfjarðar að aðstoða, eða sækja ökumann, sem þar er fastur í bíl sínum.  Hann mun vera einn í bílnum.

Samkvæmt upplýsingum frá Landsbjörgu er snælduvitlaust veður á þessum slóðum og sækist ferðin að ökumanninum því seint.

Hjálparbeiðni vegna ökumannsins barst lögreglunni skömmu fyrir klukkan sex í morgun.

Þá valt bíll heila veltu í Dýrafirði snemma í morgun en ökumann hans sakaði ekki. Þar er einnig verulega slæmt veður eins og um alla Vestfirði í augnablikinu.