Fjöldauppsagnir hjá verktökum

KNH-verktakar á Ísafirði sögðu í dag upp öllum starfsmönnum sínum, þrjátíu og þremur talsins. Þá misstu fimmtán manns vinnuna í dag hjá Suðurverki. Forstjóri Suðurverks spyr hvar öll störfin séu sem búið er að lofa og segir að það eina sem stjórnvöld komi í verk séu skattahækkanir.

Báðir bera verktakarnir við verkefnaskorti eftir að gerð Suðurstrandarvegar lauk um helgina. Hjá Suðurverki segjast menn aldrei áður í 44 ára sögu fyrirtækisins hafa verið án verksamnings og segir Dofri Eysteinsson, forstjóri Suðurverks, að þetta sé grafalvarleg staða.

Tíu manns létu af störfum hjá Suðurverki í dag og fimm til viðbótar var sagt upp, ofan á mikla fækkun á undanförnum árum. Dofri segir að þegar mest var, í framkvæmdunum á Austurlandi, hafi nærri 300 manns unnið hjá fyrirtækinu en geti orðið 30 í vetur. Hann vonast til að geta haldið þessum lágmarksmannskap áfram en vinnan verði lítil, við viðhald tækja og kannski einhver smáverk sem falli til.

Dofri segir marga fara á atvinnuleysisbætur en aðrir leiti til Noregs og fleiri landa. Hann segir óvíst að allir snúi heim aftur, mjög góður mannskapur sé þegar farinn til starfa erlendis og það sé grafalvarlegt mál að missa góða menn, ef einhverjar framkvæmdir verði á Íslandi á næstunni.

En hvaða skilaboð sendir hann stjórnvöldum?

Að bretta upp ermarnar og segja fólki sannleikann um hvað eigi að verða á Íslandi á næstunni, svarar Dofri. Það sé lofað og lofað en ekkert gerist. Hvar eru öll þessi sjöþúsund störf sem áttu að verða til, spyr hann. Það eru bara skattar og skyldur sem menn fá í hnakkann, hvort heldur það eru einstaklingar eða fyrirtæki.