Eldfjall sigursæl

Kvikmyndin Eldfjall eftir Rúnar Rúnarsson hlaut í gær tvenn verðlaun á kvikmyndahátíðnni í Montreal í Kanada. Myndin hefur fengið þrenn verðalaun á tæpri viku og vonast Rúnar til að gott gengi myndarinnar skili sér í Óskarskapphlaupinu.

Kvikmyndin Eldfjall eftir Rúnar Rúnarsson hlaut í gærkvöldi gullna úlfinn, aðalverðlaunin á kvikmyndahátíðinni í Montréal í Kanada, Festival du Nouveau Cinema. Þá hlaut myndin einnig verðlaun gagnrýnanda á hátíðinni en nítján myndir frá öllum heimshornum kepptu um verðlaunin. Rúnar er að vonum ánægður með verðlaunin

„Það er náttúrulega alltaf bara heiður að fá viðurkenningu fyrir okkar störf sem gerðu þessa mynd,“ segir Rúnar.

Kvikmyndin hefur þar með hlotið þrenn verðlaun í Norður-Ameríku á viku og er Rúnar ánægður með þau viðbrögð sem myndin hefur fengið.

„Hingað til höfum við ekki haft undan neinu að kvarta við viðbrögð við myndinni. Hún hefur fengið mjög góða gagnrýni hjá gagnrýnendum og venjulegu fólki, sem maður býr myndina til fyrir. Það er einkar gaman að sjá fólk flykkjast í bíó hérna á Íslandi en þetta er fólk sem fer oft á tíðum oft ekki mikið í bíó,“ segir Rúnar.

Eldfjall er framlag Íslands til Óskarsins þetta árið og vonast Rúnar til að gott gengi segji eitthvað til um möguleika myndarinnar á að hljóta Óskarstilfeningu.

„Þetta er fyrsta myndin mín í fullri lengd en ég hef verið að þvælast um heiminn með stuttmyndirnar mínar. Svona fyrstu viðbrögð í hvaða álfu fyrir sig eru oft merki um það sem að koma skal. Í síðustu viku þá fengum við silfurverðlaun í Chicago og það var ameríska frumsýningin og svo síðan er þetta að bætast við, þessi aðalverðulaun í Montréal. Þannig að Norður-Ameríka virðist vera að taka vel við myndinni og við vonum að það skili sér í Óskarskapphlaupinu líka,“ segir Rúnar að lokum.