Viðbúnaðarstig á Reykjavíkurflugvelli

Slökkviliðið á höfuðborgarsvæðinu lýsti yfir viðbúnaðarstigi þegar tilkynnt var um vélarbilun í lítilli einkaþotu sem óskaði eftir viðbúnaðarlendingu um klukkan níu í morgun. Lögreglan lokaði Suðurgötu við Vesturenda Reykjavíkurflugvallar þegar vélin kom inn til lendingar.

Flugvélin var lítil einkaþota af gerðinni Cessna Citation en hún var í ferjuflugi á leið frá Íslandi til Skotlands. Vélin tók á loft um klukkan átta í morgun en þegar hún beygði til suðurs í átt að Skotlandi við Ingólfshöfða kom upp bilun í rafal vélarinnar sem hristi hana alla.

Flugmennirnir tilkynntu flugstjórn um bilunina og að þeir hyggðust snúa við. Þeim var þá veitt heimild til varúðarlendingar á Reykjavíkuflugvelli.

Lögreglan lokaði þá Suðurgötunni við Vgisíðu við vesturenda brautarinnar til þess að enginn bíll yrði fyrir ef eitthvað færi úrskeiðis. Sömuleiðis voru slökkvibílar í viðbragðsstöðu á Reykjavíkurflugvelli.

Laust eftir klukkan níu lenti svo vélin hnökralaust á vellinum og ók í hlað hjá flugþjónustunni í fylgd slökkvibíls.

Einungis flugmenn vélarinnar voru um borð, en annar þeirra er eigandi vélarinnar. Hann hafði keypt vélina í Kanada fyrir nokkrum dögum og var nú að flytja hana til Cannes þar sem hann býr, en hann er frá Mónakó.

Íslenskur flugvirki var þá kallaður út til að líta á rafal vélarinnar og kanna hvort annar hreyfill hennar væri í góðu lagi en mikið sót sat á honum þegar vélin lenti. Ekki er víst hvort hann geti gert við vélina en að sögn flugmannsins þarf annars flugvirki frá framleiðanda vélarinnar að koma til Íslands. Flugmaðurinn vonast þó til þess að komast aftur í loftið síðar í dag.