Velferðarráðherra boðar þjóðarátak í heilsu

Í nýrri skýrslu velferðarráðuneytisins sem kemur út á næstu dögum og fréttastofa sagði frá á sunnudag kemur meðal annars fram að Íslendingar séu nú næstfeitasta þjóð á vesturlöndum á eftir Bandaríkjamönnum. Guðbjartur Hannesson, velferðarráðherra segir þetta áhyggjuefni sem finna þurfi lausnir á.

„Það er auðvitað margt sem kemur til greina, auðvitað efling á hreyfingu en það hefur verið gert myndarlegt átak í því og svo í neysluvenjum eða lífstílsbreytingum og síðan kemur auðvitað til greina það sem að landlæknir var að nefna neyslu stýring í gegnum skatt eða virðisaukaskatt eða annað slíkt."

Það gæti verið útfært annað hvort með því að hækka skatta á óholl eða sykruð matvæli eða lækka skatta á holl matvæli en allir möguleikar verða skoðaðir eftir að skýrslan hefur verið kynnt í samráði við landlækni og aðra hagsmunaaðila.

„Vonandi kemur bara þjóðin öll í átak, þjóðarátak í heilsu," segir Guðbjartur að lokum.