Fyrsti íslenski fanginn lýkur afplánun dóms undir rafrænu eftirliti

Fyrsti íslenski fanginn sem afplánar hluta af fangelsisdómi heima hjá sér undir rafrænu eftirliti fær þar til gert ökklaband eða farsíma þann 1.mars næstkomandi.

Lög sem kveða á um að fangar geti tekið út hluta af refsingu sinni heima við með rafrænu eftirliti voru nýlega samþykkt á Alþingi.

Páll Winkel fangelsismálastjóri segir að verið sé að útfæra með hvað hætti þetta rafræna eftirlit verði notað. Í samtali við Fréttastofu segir Páll að í fyrstu verði föngum gefinn kostur á að afplána síðasta mánuð af árslöngum dómi sínum með þessum hætti. Þeir sem eru að ljúka 2ja ára fangelsisvist geta afplánað tvo síðustu mánuði sína með þessum hætti og svo framvegis eða allt upp í 8 mánuði af átta ára löngum fangelsisdómi.

Frá 1. mars mun fyrsti íslenski fanginn ljúka afplánun síns dóms undir rafrænu eftirliti.

Ný rannsókn sem unnin var af dönskum fangelsisyfirvöldum sýnir að ungt fólk undir 25 ára aldri heldur mun síður áfram á glæpabrautinni ef það fær að afplána dóma sína undir rafrænu eftirliti í stað þess að gera slíkt í hefðbundnum fangaklefum.