Buster var í spreng og fann kannabisrækt

Fíkniefnahundurinn Buster rambaði á kannabisræktun í nótt. Lögreglumenn voru þá á ferð um um uppsveitir Árnessýslu og var Buster með í för.

Þeir stöðvuðu bílinn til þess að leyfa hundinum að míga en um leið og hann stökk út tók hann stefnuna að nærliggjandi íbúðarhúsi og gaf sterka ábendingu að þar innandyra væru fíkniefni.

„Lögreglumenn bönkuðu upp á.  Húsráðandi kom til dyra og leyndi sér ekki kannabisilmurinn sem barst út úr húsinu,“ segir í tilkynningu. „Við leit í íbúðinni fundust tæplega 40 kannabisplöntur. Lögreglan lagði hald á ræktunina og búnað auk þess var húsráðandi handtekinn og yfirheyrður. Hann viðurkenndi brot sitt. “