Bjarni fagnar dómi Hæstaréttar en minnir á mál Geirs

Bjarni Benediktsson formaður Sjálfstæðisflokksins segir ljóst að nú verði ekki bornar frekari brigður á lögmæti neyðarlaganna fyrir dómstólum hér á landi. Bjarni minnir þó á að enn sé lokið landsdómsmálinu gegn Geir H. Haarde, fyrrverandi forsætisráðherra, en hann mælti fyrir neyðarlögunum á sínum tíma.

„Hæstiréttur Íslands hefur nú staðfest að neyðarlögin, sem sett voru til að tryggja stöðu innistæðueigenda á Íslandi, standast stjórnarskrá," segir Bjarni. „Lögin voru sett þegar mikið reið á að bregðast hratt og örugglega við til að takmarka tjón vegna falls bankanna. Fyrir lögunum mælti þáverandi forsætisáðherra Geir H. Haarde."

Bjarni segir að lögin hafi þegar sannað gildi sitt og segir að viðbrögð íslenskra stjórnvalda á þessum upphafsdögum hafi verið nefnd sem dæmi um góða ráðsmennsku, „þar sem tjón vegna bankanna var takmarkað og byrðinni ekki velt yfir á skattgreiðendur. Nú er ljóst að ekki verða bornar frekari brigður á lögmæti neyðarlaganna fyrir dómstólum hér á landi."

„Þá er rétt að minna á að ólokið er landsdómsmáli því er meirihluti Alþingis studdi, gegn Geir H. Haarde, forsætisráðherranum sem fór fyrir setningu neyðarlaganna. Einnig er rétt að minna á að núverandi fjármálaráðherra, Steingrímur J. Sigfússon, sá sér ekki fært að styðja þau, né aðrir þingmenn vinstri grænna."