Orkumálastjóri: Skjálftarnir ekki endilega af mannavöldum

„Á þessu svæði, sem verið er að vinna á, þá hafa skjálftar verið í mesta lagi fimm til sex á ricther,“ segir Guðni Albert Jóhannesson, Orkumálastjóri, en Orkumálastofnun hefur að beiðni iðnaðarráðuneytisins fylgst með niðurdælingum Orkuveitu Reykjavíkur á svæðinu, sem hefur skapað fjölda smáskjálfta.

Guðni segist skilja vel ugg íbúa í Hveragerði. Hann bendir þó á að skoðanir jarðfræðinga sé sú að skjálftar á svæðinu verða ekki mikið sterkari en sex á richter. Og hver skjálfti dregur úr skjálftavirkni.

„Það gerir enginn lítið úr þessu ástandi,“ segir Guðni en bendir á að það sé ekki gefið að svo sterkir skjálftar séu endilega af mannavöldum. Hann segir svæðið virkt jarðskjálftasvæði og mikið hafi verið um jarðskjálfta víða á landinu. Þá hafi Orkuveitan verið að dæla stanslaust í rúman mánuð.

Íbúum Hveragerðis var mjög brugðið í morgun þegar tveir skjálftar sem mældust tæplega fjórir á richter skóku bæinn á innan við klukkustund.

Aldís Hafsteinsdóttir, bæjarstjóri Hveragerðis sagði þetta ólíðandi og sendi Orkuveitunni tóninn. Hún sagði bæjarbúa reiða og í raun brugðið eftir morguninn.

Upplýsingafulltrúi Orkuveitunnar í Reykjavík sendi svo tilkynningu á fjölmiðla fyrir stundu þar sem boðað er til opins upplýsingafunds á Hótel Örk í Hvergerði á mánudagskvöldið næsta. Fundurinn hefst klukkan átta. Í tilkynningu segir að á fundinum verður kynnt niðurstaða nýrrar samantektar jarðvísindamanna um skjálftavirknina.

Úttektin er gerð að frumkvæði iðnaðarráðuneytisins. Vísindamenn á Orkustofnun hafa umsjón með vinnunni og njóta liðsstyrks starfssystkina hjá Íslenskum orkurannsóknum, Veðurstofu Íslands og Orkuveitu Reykjavíkur.

Markmið samantektarinnar er að varpa ljósi á eðli skjálftahviðanna og leitast við að spá fyrir um hversu lengi þær geti varað. Leita á einnig svara við því hvort skjálftarnir dragi úr spennu í jarðlögum og komi þannig í veg fyrir enn stærri skjálfta.

Fulltrúi Orkustofnunar mun kynna samantekt vísindafólksins á fundinum.