Vildu ekki vinna eineltisálit með minnihluta vegna tengsla við skólann

N listinn í Sveitarfélaginu Garði hefur óskað eftir að fá afrit af bréfi því sem bæjarstjóri og meirihluti skólanefndar sendu til Mennta og menningarráðuneytisins, undirritað af þeim, samkvæmt frétt Víkurfrétta um málið.

N listinn gagnrýnir ófagleg og lítt lýðræðisleg vinnubrögð sem viðhöfð hafa verið í málefnum Gerðaskóla.

Greinargerð sem bæjarstjóri átti að vinna, að ósk ráðuneytisins í samráði við skólanefnd var án aðkomu fulltrúa N og L lista og án samvinnu við aðra nefndarmenn. Þetta kemur fram í bókun frá fulltrúum N listans á síðasta fundi bæjarráðs Garðs.

Meirihluti D-lista bókaði að hann telur að ekki hafi verið hægt að vinna svör til Mennta- og menningarmálaráðuneytisins á annan hátt þar sem minnihluti í skólanefnd og minnihluti í bæjarstjórn eru of tengdir málefnum skólans verandi kennarar eða makar kennara.

N-listinn lýsir undrun sinni í bókun að þessar upplýsingar komi hér fyrst fram. Meirihluti D-lista ætti að fagna því að fulltrúar minnihluta og fulltrúar kennarar í skólanefnd geta gefið ráðgefandi upplýsingar eins og lög kveða á um.

Meðal niðurstaðna í greinagerðinni var mikið einelti og getuleysi skólans til þess að takast á við það.

Sjálfstæðisflokkurinn gagnrýndi skólann fyrir aðgerðaleysi í bókun Skólanefndar. Þá sagði meðal annars í bókun skólanefndar í lok september, að fjölskyldur hefðu þurft að flýja Garð vegna viðvarandi eineltis. Ennfremur sagði í skýrslunni að hluti af eineltinu færi fram í skólastofum þar sem kennarar væru viðstaddir.