Komu hingað til lands vegna líflátshótana

Þrjátíu og átta ára gamall maður og tuttugu og þriggja ára gömul kona, bæði frá Írak, voru dæmd í þrjátíu daga fangelsi í Héraðsdómi Reykjaness í dag.

Parið framvísaði fölsuðum vegabréfum við komuna til landsins í ágúst síðastliðnum en þau hafa setið í gæsluvarðhaldi síðan. Þau hafa sótt um hæli hér á landi en maðurinn sagði fyrir dómi að þau hafi komið hingað til lands vegna þess að honum hefur borist líflátshótanir frá fjölskyldu konunnar. Hún sé ekki sátt að þau séu saman, þar sem hann er múslimi og hún annara trúar.

Eftir að fangelsisvistinni lýkur fer mál þeirra inn á borð Útlendingastofnunar sem tekur ákvörðun um það hvort þeim verði vísað úr landi.