Hagsmunasamtök heimilanna svara Seðlabankanum

Hagsmunasamtök heimilanna liggja nú yfir svörum Seðlabanka Íslands sem bárust í gær við fyrirspurnum Umboðsmanns Alþingis vegna verðtryggingarinnar. Hagsmunasamtökin munu senda frá sér yfirlýsingu á næstu dögum vegna málsins.

Málið hófst á því að Hagsmunasamtök heimilanna kvörtuðu til Umboðsmanns Alþingis, en þau töldu að reglur Seðlabankans um að verðbætur skyldu leggjast á höfuðstól lána væru ólögmætar. Umboðsmaður sendi Seðlabankanum fyrirspurn vegna kvörtunarinnar, sem bankinn svaraði í gær.

Í svörunum kemur helst fram að reglur bankans séu í samræmi við upphafleg markmið laganna og einnig að það breyti engu fyrir skuldara hvort verðbæturnar eru lagðar á höfuðstólinn eða afborganirnar af láninu verðtryggðar. Endanleg upphæð lánsins verði alltaf sú sama.