Segja stjórnvöld senda kaldar kveðjur á sjómannadeginum

„Kaldar kveðjur og nístandi óvissa er sendingin úr Stjórnarráðinu fyrir sunnan í tilefni sjómannadagsins og með fylgja loforð um að lögfesta bæði fækkun starfsfólks og kjaraskerðingu í sjávarútvegi“, en svo segir í yfirlýsingu frá Útvegsmannafélagi Vestfjarða.

Þar segir að aflaheimildir á Vestfjörðum skerðist um 3.700 þorskígildistonn á ári ef lög um breytingar á fiskveiðistjórnarkerfinu verða að veruleika.

„Þetta jafngildir samanlögðum aflaheimildum Drangsness, Bíldudals, Hólmavíkur, Tálknafjarðar, Brjánslækjar og Suðureyrar,“ segir svo í harðorðri yfirlýsingu útvegsmannanna.

Þá kemur fram að sjómenn  á Vestfjörðum eru alls um 400 og fiskverkafólk um 460 talsins. Ef frumvörpin verða að lögum telja vestfirskir útvegsmanna að um 100 störf tapist. Þar af 45-50 hálaunastörf til sjós og um 50 störf í fiskvinnslu.

Þetta eru meginniðurstöður úttektar Útvegsmannafélags Vestfjarða á áhrifum þess að sjávarútvegsstefna stjórnvalda verði lögfest.