Börn neita að taka Rítalín vegna umræðunnar

Foreldrar ungmenna með ADHD segja þau nú neita að taka lyfin í kjölfar umræðunnar sem hefur átt sér stað í kringum misnotkun á metýlfenídat lyfjum og skyldum lyfjum, s.s. Rítalíni. Þetta kemur fram í tilkynningu sem stjórn ADHD samtakanna sendi frá sér en fjöldi félaga eru ósáttir við það hvernig Rítalíni og skyldum lyfjum hefur nánast eingöngu verið lýst sem dópi í fjölmiðlum.

Stjórn ADHD (athyglisbrestur með ofvirkni) bendir á að margir einstaklingar þurfi á lyfjunum að halda til þess að geta stundað skóla, atvinnu, og haft tök á lífinu og tilverunni. Vilja samtökin því ítreka það að um sé að ræða lyf sem fyrst og fremst séu ætluð til lækninga en ekki þeirrar misnotkunar sem borið hefur hæst í fjölmiðlum undanfarið, þó svo undantekningartilvikin er varða misnotkun séu mjög áberandi og sorgleg.

Vill stjórnin því að farið sé varlega í umræðu um lyfin enda sé þeim fyrst og fremst ávísað til að hjálpa fólki. Lækning sé tilgangur lyfjanna. Misnotkunin sé hins vegar eitthvað sem stjórnvöld þurfi að taka á.