Ísland verði stórveldi innan ESB í sjávarútvegsmálum

Baldur Þórhallsson, varaþingmaður Samfylkingarinnar, segir Ísland geta orðið stórveldi á sviði sjávarútvegsmála innan Evrópusambandsins. Hann kallaði eftir afstöðu formanns Sjálfstæðisflokksins í Evrópumálum við upphaf þingfundar í dag. Þingmaður Sjálfstæðisflokksins gaf lítið fyrir yfirlýsingar Baldurs og sagði lagasetningu Evrópusambandsins stórhættulega.

Baldur beindi spurningum sínum til Bjarna Benediktssonar, formanns Sjálfstæðisflokksins, um Ísland og Evrópumálin. Sjálfstæðisflokkurinn hafi eitt sinn verið mikilvægasti hlekkurinn í tengingu landsins við vestræna samvinnu. Í dag fari vestræn samvinna Evrópuþjóða fram á vettvangi Evrópusambandsins.

Baldur sagði eina mestu breytingu sem orðið hafi á stjórnskipun Íslands hafi átt sér stað með gildistöku samninganna um Evrópska efnhagsssvæðið og Schengin. Með samningunum hafi Íslendingnar tekið á sér þær kvaðir að taka inn stóran hluta löggjafar Evrópusambandsins án þess að geta haft áhrif á löggjöfina nema að takmörkuðu leiti.

Ólýðræðislegur samningur

Baldur vildi vita hversu lengi Sjálfstæðisflokkurinn og leiðtogi hans ætlaði að sætta sig við að Alþingi og stjórnvöld hefðu nær engan möguleika á að hafa áhrif á þá löggjöf sem landsmenn væru skikkaðir til að fara eftir vegna aðildar að EES og Schengin. EES samningurinn hafi að mörgu leiti verið Íslendingum til góðs. Hann sé hins vegar ekki ásættanlegur fyrir þjóð sem telji sig sjálfstæða og fullvalda. „Samningurinn er einn sá ólýðræðislegasti alþjóðasamningur sem nokkurn tímann hefur verið gerður af sjálfstæðri þjóð, ef ekki sá ólýðræðislegasti."

Þá sagði Baldur: „Ef löggjöf Evrópusambandsins er svona góð og við þurfum ekki að hafa áhrif á hana þá hlýtur að vera enn betra fyrir okkur að vera innan sambandsins þar sem við getum meðal annars haft frumkvæði að lögum og gert Ísland að stórveldi þegar kemur að sjávarútvegsmálum innan sambandsins."

Völd færð frá fólkinu með inngöngu

Bjarni svaraði spurningu Baldurs ekki að fullu en sagði Alþingi ekki nýta öll þau tækifæri sem gefast í ESS samstarfinu til þess að hafa áhrif. Þingið hafi ekki tekið þátt í nefndarstarfi á því stigi mála þegar engar ákvarðanir hafi verið teknar og áður en þau væru tekin upp í EES-samningnum. Bjarni sagði ekki hægt að halda því fram að með því að undirgangast fleiri svið Evrópusambandsins myndi Ísland öðlast meiri völd. Ísland fengi 4-6 þingmenn af 800 á Evrópuþinginu. „Því verður náttúrlega ekki haldið fram með rökum að þeir þingmenn geti haft einhver áhrif sem máli skipti." Jafnframt sagði Bjarni lýðræðishalla vera innan Evrópusambandsins og innganga í sambandið myndi færa valdið lengra frá fólkinu.

Ofmat

Guðlaugur Þór Þórðarson, þingmaður Sjálfstæðisflokksins, tók þátt í umræðunni og gaf lítið fyrir hugmyndir Baldurs um Ísland sem stórveldi á sviði sjávarútvegsmála innan Evrópusambandsins. Hann sagði auk þess lagasetningu sambandsins vera stórhættulega. Sigurður Kári Kristjánsson, þingmaður Sjálfstæðisflokksins, talaði um ofmat í þessu samhengi. Ísland fengi að auki fáa þingmenn á Evrópuþinginu við inngöngu. „Slík þjóð verður ekki stórveldi á þessum vettvangi."

Valgerður Bjarnadóttir, þingmaður Samfylkingarinnar, sagði þjóðir vel geta haft áhrif óháð stærð þeirra. Það væri ekki það sama að vera inni í fundarherberginu og að sitja frammi á gangi.