Gengu brattar hlíðar vegna skipsstrands

Björgunarsveitir frá Tálknafirði, Patreksfirði og Bíldudal ásamt björgunarskipinu Verði voru kallaðar út um hálf ellefu í morgun eftir að hjálparbeiðni barst frá bát sem strandaði skammt utan við Tálknafjörð nánar tiltekið við Mölvík.

Björgunarsveitarmenn fóru á staðinn bæði frá sjó og landleiðina en þeir þurftu að ganga um 6 kílómetra leið um mjög brattar hlíðar þar sem leiðin er algjörlega ófær ökutækjum, að því er fram kemur í tilkynnningu frá Landsbjörg. Einn maður var um borð og ekkert amaði að honum. Björgunarsveitarmenn komu línu í bátinn sem var dreginn út af björgunarskipinu Verði sem er á leið með bátinn til hafnar.