Framsóknarmenn í Kópavogi vara við að alið sé á úlfúð í garð útlendinga

Framsóknarmenn í Kópavogi sendu í gærkvöldi frá sér ályktun þar sem varað er við því að alið sé á umræðu á þjóðernislegum nótum og úlfúð í garð útlendinga og þess sem erlent er.

Ályktunin var samþykkt á aðalfundi fulltrúaráðs framsóknarfélaganna í bænum en þar segir ennfremur að slík umræða muni ekki skila samfélaginu fram á veg.

Án þess að það sé sagt berum orðum í ályktuninni er henni augljóslega beint meðal annars að fyrirspurn Sigmundar Davíðs Gunnlaugssonar formanns Framsóknarflokksins sem á dögunum bað um upplýsingar frá innanríkisráðherra um þátt útlendinga í afbrotum hér á landi.

Framsóknarmennirnir í Kópavogi segja að fáar þjóðir eigi jafn mikið undir góðum samskiptum við aðrar þjóðir og Íslendingar og því séu fyrirspurnir eða orðræða sem tengir saman glæpi og útlendinga til þess fallnar að auka á fordóma í samfélaginu og draga úr umburðarlyndi og samhug.