Boðar fjárfestingu upp á hundruð milljarða í orkufrekum iðnaði

Forsætisráðherra boðar fjárfestingar í orkufrekum iðnaði og tengdum virkjanaframkvæmdum upp á þrjú til fjögur hundruð milljarða á næstu þremur til fimm árum. Þá vill hún þjóðaratkvæðagreiðslu um breytingar á kvótakerfinu strax næsta haust

Forsætisráðherra sagði það stefnu ríkisstjórnarinnar að launþegar, lífeyrisþegar og barnafjölskyldur fengju að nóta lífskjarasóknarinnar sem væri framundan. „Ofurlaunaliðið, fjárglæframennirnir og stóreignaelítan fær ekki að soga til sín hagvöxtinn sem framundan er ef við fáum að ráða. Það er nóg að þjóðin hafi þurft að greiða fyrir síðasta gleðskap þessa fólks. Sú svallveisla var haldinn undir lúðrablæstri frjálhyggjutrúboðs Sjálfstæðisflokksins. Lífskjarasóknin sem framundan er verður hinsvegar á forsendum jafnaðarstefnunar."

Forsætisráðherra sagði að ríkisstjórnin ætlaði að hrinda í framkvæmd hagvaxtar- og fjárfestingaráætlun á næstunni sem byggði á tveggja prósenta hagvexti í ár og fjögur til fimm prósent á næstu tveimur árum.

„Stefnt er að amk tveimur umfangsmiklum fjárfestingaverkefnum í orkufrekum iðnaði auk þeirra umfangsmiklu framkvæmda sem þegar eru komnar á stað við Búðarhálsvirkjun, álverið í Straumsvík, Kísilverksmiðju í Helguvík, Gagnaver á Suðurnesjum, álverið á Reyðarfirði og víðar. Ég reikna með að nú styttist verulega í að tilkynnt verði um framkvæmdir í tengslum við orkufrekann iðnað á Norðurlandi. Ég er líka orðin mun bjartsýnni en áður, um að Norðurál nái semja við HS orku og Orkuveituna um nægilega orku til að álver þeirra í Helguvík geti orðið að veruleika með tilheyrandi framkvæmdum við Hverahlíðarvirkjun, Reykjanesvirkjun og línulagnir í tengslum við orkufrekann iðnað á Suðurnesjum. Ef ofangreind verkefni ganga öll eftir gætum við því verið að tala um fjárfestingar í orkufrekum iðnaði og tengdum virkjanaframkvæmdum uppá 300-400 milljarða á næstu þremur til fimm árum og sex til sjö þúsund ársverk við uppbygginguna," sagði forsætisráðherra.



Fullbúinn aðildarsamningur í lok næsta árs

Forsætisráðherra gagnrýndi LÍÚ fyrir ómálefnalegan málflutning í tengslum við kvótakerfið. Hún ítrekaði mikilvægi þess að frumvörpin um fiskveiðistjórnun kæmust á dagskrá á yfirstandandi þingi.

„Vel mætti einnig hugsa sér að tillögur stjórnlagaráðs og kerfisbreyting á fiskveiðistjórnunarkerfinu færu saman í þjóðaratkvæðagreiðslu í haust eða næsta vetur. Hvorutveggja eru rísavaxin mál sem engri annarri ríkisstjórn væri treystandi til að leiða til lykta."

Forsætisráðherra vék að aðildarviðræðum við Evrópusambandið og sagði að fullbúinn aðildarsamningur gæti legið fyrir í lok næsta árs. „Allt bendir því til að við gætum lokið þessu mikilvæga máli fyrir lok þessa kjörtímabils.Samhliða getum við jafnframt undirbúið okkur fyrir mögulega upptöku Evru, þó kannski líði um þrjú ár frá samþykkt aðildar þar til Evran gæti tekið við sem fullgildur gjaldmiðill þjóðarinnar," sagði forsætisráðherra.