Svandís verður líklega tímabundið menntamálaráðherra

Ekki er talið líklegt að ráðherralið Vinstri grænna taki miklum breytingum þegar Katrín Jakobsdóttir fer í fæðingarorlof.

Svandís Svavarsdóttir mun væntanlega gegna stöðu menntamálaráðherra á meðan Katrín er í leyfi.

Katrín Jakobsdóttir, menntamálaráðherra, fer fæðingarorlof í næsta mánuði og mun í fyrsta lagi snúa aftur í október eða nóvember næstkomandi.

Margir hafa talið líklegt að forystumenn ríkisstjórnarflokkana myndu nýta þetta tækifæri til að gera breytingar á ráðherraliði ríkisstjórnarinnar. Þrír þingmenn hafa yfirgefið þingflokk vinstri grænna á þessu ári og þá hefur gengið brösuglega hjá ríkisstjórninni að sameina ráðuneyti meðal annars vegna andstöðu Jóns Bjarnasonar, sjávarútvegs- og landbúnaðarráðherra.

Samkvæmt heimildum fréttastofu stendur hins vegar ekki til að skipta ráðherrum út né gera miklar breytingar á ráðherraliðinu. Rætt er um að Svandís Svavarsdóttir gegni embætti menntamálaráðherra samhliða störfum sínum sem umhverfisráðherra þangað til Katrín snýr aftur en það mun skýrast á næstu vikum.

Þessi niðurstaða þykir líklegust því að öðrum kosti þyrfti að setja Katrínu af sem ráðherra sem væri bagalegt fyrir ríkisstjórn sem kennir sig við jafnrétti.