Fjórir grímuklæddir menn réðust á tvo menn í Fischersundi

Fjórir grímuklæddir menn réðust á tvo menn í Fischersundi í Reykjavík um eitt leytið í nótt vopnaðir barefli. Mönnunum tókst að stökkva árásarmönnunum á flótta og komu sér sjálfir á slysadeild til aðhlynningar og létu lögreglu vita.

Einn árásarmannanna var með hokkígrímu fyrir andlitinu og annar var vopnaður rörstöng. Lögreglan segir að talið sé að árásarmennirnir séu í kring um tvítugt.

Afar sjaldgæft er að menn fari vopnaðir og grímuklæddir um götur Reykjavíkur að sögn vaktstjóra hjá lögreglunni. Árásarmennirnir hafi líklega verið að reyna að komast yfir fjármuni til vímuefnakaupa. Tvímenningarnir sem ráðist var á eru ekki mikið slasaðir.