SA funda um yfirlýsingu ríkisstjórnar

Stjórn Samtaka atvinnulífsins kemur saman í morgunsárið til að meta yfirlýsingu stjórnvalda sem Jóhanna Sigurðardóttir forsætisráðherra og Steingrímur J. Sigfússon fjármálaráðherra kynnti forystumönnum samtakanna í gærkvöldi. Það gæti því ráðist í dag hvort endanlega slitnar upp úr kjaraviðræðum eða hvort fulltrúar SA og Alþýðusambandsins setjast aftur að samningaborðinu.

Yfirlýsing sem oddvitar stjórnarflokkanna sendu fjölmiðlum í gærkvöld var stutt en þar segir að þau hafi í gærkvöldi sent ríkissáttasemjara lokaútgáfu yfirlýsingar ríkisstjórnarinnar í tengslum við mögulega kjarasamninga til þriggja ára, milli aðila á almennum vinnumarkaði.

Yfirlýsingunni fylgdi einnig sérstök bókum um málsmeðferð vegna væntanlegs frumvarps ríkisstjórnarinnar um breytingar á fiskveiðistjórnunarkerfinu. Með þessu hafi ríkisstjórnin gert allt sem í hennar valdi standi til að auðvelda aðilum á almennum vinnumarkaði að ná saman um kjarasamninga til þriggja ára.

Mikið veltur á viðbrögðum Samtaka atvinnulífsins við þessu útspili ríkisstjórnarinnar. Í loftinu liggur hótun verkalýðsforystunnar um boðun verkfalls ef ekki semst á næstu dögum og verkalýðsforystan vill fyrirvara um stjórnun fiskveiða út af samningaborðinu. Að loknum stjórnarfundi SA munu forysta þess og Alþýðusambandsins koma sman til fundar hjá Ríkissáttasemjara fyrir hádegi.