Skynjunarskóli í Kling og Bang

Á sýningunni Marglaga í Kling og Bang fjalla myndlistarmenn um skynjun, innsæi og tilfinningar.

Í galleríinu Kling og Bang hefur mikið verið um að vera undanfarnar vikur. Þar hefur hópur nýútskrifaðra myndlistarmanna tekið yfir; sýning þeirra Marglaga gengur út á að skoða og rannsaka skynjun, innsæi og tilfinningar. Í tengslum við sýninguna hefur verið settur á laggirnar skynjunarskóli.

Ingibjörg Sigurjónsdóttir, einn aðstandenda sýningarinnar, segir hugmyndina að inntaki sýningarinnar hafa kviknað hjá nemendunum í framhaldi af vangaveltum þeirra um framhaldsnám og skóla. "Við vorum mikið að velta okkur upp úr veruleikanum okkar, námi og skóla og þá hvernig maður vill hafa skóla. Í framhaldinu fórum við að velta fyrir okkur því hvort maður lærði alltaf mest í skólum og hvað fælist eiginlega í því að læra."

Eftir nokkurra ára vist í Listaháskóla Íslands höfðu Ingibjörg og félagar hennar lært ýmislegt en hún segir að þegar þau fóru að velta fyrir sér hvað var mikilvægast af því sem þau tóku með sér í veganesti úr skólanum hafi þau komist að því að einna dýrmætast væru öll tengslin sem þau mynduðu þar. "Okkur langaði til að búa til vettvang þar sem hin óáþreifanlegu tengsl sem myndast á milli fólks eru efniviðurinn, langaði til að vinna með innsæi og skynjun sem oft þarf að víkja fyrir skynsemi og rökvísi."

Þannig varð skynjunarskólinn til; Ingibjörg og félagar hennar höfðu samband við myndlistarmenn sem hafa unnið mikið með innsæi og fengu þá í lið með sér til að leiða uppákomur þar sem skynjun og innsæi ráða ferðinni.

Á morgun klukkan 16 fjallar Katrín I. J. H. Hirt um viðhorf listamanna til þess að útskýra listaverk sín og annað kvöld verða myndlistar- og tónlistarmenn með skynjunarleikhús.

"Við erum afar ánægð með viðbrögðin sem við höfum fengið," segir Ingibjörg, en auk hennar standa að sýningunni þau Anna Hrund Másdóttir, Lilja Birgisdóttir, Katla Rós, Ragnar Már Nikulásson, Selma Hreggviðsdóttir og Þórgunnur Oddsdóttir.

Sýningin er opin frá 14 til 18 en henni lýkur um helgina.

sigridur@frettabladid.is