Þýfiskaupendur mega búast við ákærum

Í tengslum við rannsókn á fjölda innbrota í heimahús nýverið hefur lögreglan á höfuðborgarsvæðinu síðustu daga lagt áherslu á að endurheimta þýfi sem stolið var í þessum innbrotum.

Í tilkynningu frá lögreglunni segir að húsleitir hafi verið gerðar í því skyni á fjölmörgum stöðum og meðal annars verið farið í íbúðir fólks sem grunur lék á að hafi keypt stolna muni.

Að sögn lögreglu hafa fundist flatskjáir og fartölvur meðal annars. „Þeir einstaklingar sem höfðu muni þessa í sinni vörslu hafa verið yfirheyrðir af lögreglu sem sakborningar. Þeir mega eiga von á ákæru vegna þessa auk þess að sæta upptöku munanna,“ segir ennfremur.