86 dagblöð í áskrift og 13 héraðsfréttablöð

Innanríkisráðuneytið og stofnanir þess eru alls með áskrift að 86 dagblöðum og 13 dagblöð í netáskrift. Mánaðarlega eru greiddar tæpar 307 þúsund krónur vegna þessa. Þá greiðir ráðuneytið og stofnanir þess mánaðarlega fyrir áskrift að 24 héraðsfréttablöðum, alls rúmar 33 þúsund krónur.

Þetta kemur fram í svari ráðuneytisins, sem lagt var fram á Alþingi í dag, við fyrirspurn Marðar Árnasonar, þingmanns Samfylkingarinnar.

Innanríkisráðuneytið sjálft er áskrifandi að þremur eintökum af Morgunblaðinu, þremur af Fréttablaðinu, þremur af Viðskiptablaðinu og einu af DV.

Þegar áskriftin er skoðuð eftir stofnunum sést að Umferðarstofa kaupir áskrift að Morgunblaðinu og Viðskiptablaðinu, einu eintaki af hvoru. Siglingamálastofnun er síðan með netáskrift hjá Morgunblaðinu og DV.

Nánari útlistingu á svörunum má sjá með því að smella hér.