Skora á Menntaráð að hætta við sameiningarhugmyndir

Stjórn Félags stjórnenda leikskóla hefur sent frá sér ályktun þar sem skorað er á Menntaráð Reykjavíkur að draga nú þegar til baka tillögur um sameiningu og samrekstur leikskóla.

Í ályktuninni er talað um „aðför að skólastjórnun“ og segir ennfremur að breytingar á skólastarfi þurfi að koma „innan frá í nánu samstarfi stjórnenda, kennara og foreldra.“ Þá segir að farsælar breytingar séu unnar af fagmennsku sem byggi á skýrri framtíðarsýn.

Undir ályktunina ritar fyrir hönd stjórnar, Ingibjörg Kristleifsdóttir, formaður félagsins.