Mikið um hraðakstur í borginni

Að sögn lögreglu ber nokkuð á hraðakstri á höfuðborgarsvæðinu um þessar mundir. „Tuttugu ökumenn voru teknir fyrir hraðakstur á Reykjanesbraut í Garðabæ í gær og í fyrradag voru höfð afskipti af allnokkrum ökumönnum sem fóru heldur greitt um Ártúnsbrekku,“ segir í tilkynningu en á báðum stöðum er 80 km hámarkshraði. „Allir fyrrgreindir ökumenn óku á 100 km hraða eða meira,“ segir ennfremur.

„Lögreglan hefur einnig verið við hraðamælingar á Engjavegi í Laugardal undanfarna daga og orðið vitni að háu brotahlutfalli, jafnvel 73%. Þar er 30 km hámarkshraði en í gær var bíll mældur þar á 64. Ökumaðurinn, karl um fimmtugt, var sviptur ökuréttindum til bráðabirgða.“