Dregið hefur úr skjálftahrinunni

Dregið hefur úr skjálftahrinu sem hefur verið á Krýsuvíkursvæðinu frá því á fimmtudagskvöld. Hrinan náði hámarki í morgun þegar þrír skjálftar yfir 3 á richter mældust, sá stærsti fjórir að stærð.

Sigþrúður Ármannsdóttir, landfræðingur hjá Veðurstofu Íslands, segir að frá því klukkan hálf eitt hafi litlir skjálftar mælst, töluvert minni en í morgun.

„Það hefur heldur dregið úr þessu, en þetta er ekkert búið. Hrinan byrjaði á fimmtudagskvöld og getur haldið áfram í dag og jafnvel lengur. Ég held að það skrúfist ekkert fyrir hana í dag."

Hrinur sem þessar hafa verið áberandi í haust og vetur og en þær hófust fyrir tveimur árum. Þeim fylgdi óvenju mikið landris, en land reis um þrjá sentímetra í Krýsuvík, og töldu jarðvísindamenn þá ástæðu til að upplýsa almannavarnir um hræringarnar.

Landrisið gekk til baka í fyrravetur og á fyrri hluta síðasta árs en hófst svo að nýju í fyrravor. Þá var ákveðið að vakta svæðið betur og í því skyni var tveimur nýjum GPS-mælum komið upp. Skjálftahrinurnar í haust komu vísindamönnum ekki á óvart og höfðu þeir áður látið almannavarnir vita að búast mætti við hræringum á svæðinu.