Björgun Goðafoss lokið

Björgun Goðafoss er nú lokið og siglir skipið fyrir eigin vélarafli áleiðis til Danmerkur. Um klukkan hálffimm átti skipið örfáar mílur eftir til að komast út fyrir norska skerjagarðinn, samkvæmt tilkynningu frá Eimskip. Eins og fram hefur komið gekk björgun Goðafoss mun betur en þorað var að vona í upphafi.

Eimskip segir að umhverfisáhrif virðist vera minni en þorað var að vona og slys á fólki urðu engin. Skipt verður um áhöfn í Danmörku og sú áhöfn sem hefur verið um borð heldur heim til Íslands í faðm fjölskyldu og vina eftir erfiða viku. Allir gámar sem voru um borð eru komnir til Fredrikstad og verður komið til eigenda á næstu dögum.