Carine Roitfeld í samkeppni við franska Vogue

Goðsögnin Carine Roitfeld, fyrrverandi ritstjóri franska Vogue, sagðist ætla að sigla á ný mið eftir starf sitt hjá tímaritinu. Samkvæmt heimildum gæti þó vel verið að Roitfeld haldi sig við það sem hún gerir best og stofni franska Harper's Bazaar.

Samkvæmt Hintmag.com gæti verið að Roitfeld muni stofna franska Harper's Bazaar í nánustu framtíð. Verði ekkert úr því hefur henni boðist starf sem listrænn ráðgjafi tískuhússins YSL og hefur Dior einnig sýnt áhuga á að fá hana til starfa sem stílista.

Það kemur mörgum á óvart að Roitfeld ætli sér að halda áfram í sama bransa og þá sérstaklega að hún hafi kosið að fara í beina samkeppni við franska Vogue. Flestir töldu að Roitfeld myndi finna sér starf sem stílisti en hún hóf einmitt feril sinn innan tískubransans sem slíkur.

Í viðtali við Style.com sagði Roitfeld að framtíðin væri enn óráðin en að hún ætlaði sér að halda áfram að starfa innan tískuheimsins. „Ég veit ekki hvaða leið ég mun velja. Annað hvort held ég áfram í fjölmiðlum eða gerist músa einhvers."

Hún staðfesti einnig að samband hennar og Emmanuelle Alt, arftaka hennar hjá franska Vogue, væri ekki gott og gæti það verið ástæðan fyrir því að hún ætli sér í samkeppni við sinn gamla vinnustað.- sm