Reisa bensínstöð í landi kirkju

Sveitarstjórn Húnaþings vestra hefur samþykkt að Skeljungur annist gerð deiliskipulags á lóð sem fyrirtækið hefur tekið á leigu frá kirkjunni á jörðinni Melstað í Miðfirði. Skeljungur hyggst reisa 330 fermetra þjónustumiðstöð með bensínafgreiðslu, verslun og veitingasölu.

Melstaður í Miðfirði er prestsetur og kirkjustaður í Húnaþingi vestra. Kirkjuráð samþykkti á fundi í mars síðastliðnum að gengið yrði til samningaviðræðna við Skeljung. Ráðið staðfesti síðan gerðan leigusamning á fundi sínum 3. ágúst, en vegna þess að hann er langtímasamningur þurfti kirkjuráðið að heimila hann.

Þess var einnig farið á leit að umhverfisstefna þjóðkirkjunnar yrði höfð að leiðarljósi við skipulag svæðisins, en Skeljungur óskaði eftir breytingu á bæði aðal- og deiliskipulagi við byggðarráð Húnaþings. Byggðarráð vísaði málinu til skipulags- og umhverfisráðs, sem lagði til að aðalskipulagi yrði breytt og unnið að deiliskipulagi. Sveitarstjórnin hefur síðan samþykkt þetta.

Skeljungur áætlar að um tíu til fimmtán störf geti skapast allt árið um kring við þjónustumiðstöðina, en að á sumrin muni allt að tuttugu manns vinna þar. - þeb