Gylfi Þór: Ætlum að spila fyrir Óla

Gylfi Þór Sigurðsson verður í sviðsljósinu í Porto í kvöld þegar íslenska landsliðið mætir því portúgalska í síðasta leik sínum í undankeppni EM 2012. Gylfi missti af síðustu verkefnum landsliðsins vegna meiðsla en er nú aftur klár í slaginn.

„Þetta verður að sjálfsögðu erfiður leikur og það er það alltaf á móti Portúgal hvort sem við erum að spila við þá heima eða úti. Þetta verður erfiður leikur," sagði Gylfi í viðtali við Guðmund Benediktsson, íþróttafréttamann á Stöð 2 Sport.

„Það vantar einhverja leikmenn hjá okkur núna en ég held að það vanti líka einhverja hjá Portúgal. Þetta verður örugglega fínn leikur," sagði Gylfi.

„Þetta er svolítið öðruvísi staða en þegar við erum að byrja keppnina. Þá er markmiðið að ná í einhver stig og komast áfram en við höfum ekkert til að spila fyrir riðlinum lengur. Við erum að spila fyrir landið og spila fyrir Óla þar sem að þetta er síðasti leikurinn hjá honum. Ég held að allir leikmennirnir séu vel stemmdir fyrir leikinn og ætli að gera sitt besta," sagði Gylfi en hann vill ekki gefa neitt upp um hvern hann telji eiga að taka við af Ólafi Jóhannessyni.

„Ég hef voðalega litlar skoðanir á því hver verður næsti landsliðsþjálfari enda skiptir það litlu máli hvað mér finnst hvort sem er. Ég hef lítið að segja um það hver verður næsti landsliðsþjálfari en við erum að einbeita okkur að þessum síðasta leik hjá Óla og reyna að standa okkur í honum," sagði Gylfi en það má sjá allt viðtalið með því að smella hér fyrir ofan.