Fréttastofurnar verðlaunaðar sameiginlega fyrir bestu umfjöllun

Fréttastofa Stöðvar 2, Fréttastofa RÚV og Ritstjórn Morgunblaðsins hlutu blaðamannaverðlaun ársins 2010 fyrir bestu umfjöllun í Gerðarsafni í Kópavogi rétt í þessu.

Í áliti dómnefndar segir meðal annars að fréttastofur Stöðvar 2 og RÚV og ritstjórn Morgunblaðsins hafi verið með umfangsmikla og vandaða en ólíka umfjöllun um eldgosin á Fimmvörðuhálsi og í Eyjafjallajökli.

Ingibjörg Dögg Kjartansdóttir, blaðakona á DV, hlaut verðlaun fyrir rannsóknarblaðamennsku ársins 2010 fyrir áleitna og vandaða umfjöllun um kynferðisbrotamál og forystu um skrif á þessu sviði, svo sem um biskupsmálið og önnur meint kynferðisbrot innan kirkju og trúfélaga.

Þá hlaut Kristinn Hrafnsson blaðamannaverðlaun ársins 2010 fyrir framúrskarandi úrvinnslu á myndbandi um þyrluárás í Bagdad sem hann vann ásamt Inga R. Ingasyni. Einnig fyrir störf sín sem fulltrúi WikiLeaks í samstarfi við helstu fjölmiðla heims við að koma mikilvægum upplýsingum á framfæri.