Bæjarbúar hafðir að leiksoppum

Formaður íbúasamtaka Önundarfjarðar furðar sig á vinnubrögðum Byggðastofnunar en stjórn Byggðastofnunar ákvað í gær að rifta samningum við Lotnu. Hann segir ákvörðun byggðastofnunar ljótan leik, bæjarbúar á Flateyri hafi verið hafðir að leiksoppum.

Gleði íbúa á Flateyri snerist upp í andhverfu sína þegar í ljós kom að ekkert yrði úr áformum Lotnu um fiskvinnslu í þorpinu. Stjórn Byggðastofnunar kom saman í gær og ákvað að samþykkja ekki kaup Lotnu á eignum úr þrotabúi Eyrarodda.

Fiskvinnsluvélar voru komnar í gang og þorskarnir á færibandinu færðust nær, þegar fréttirnar dundu yfir.

„Við erum leiksoppur manna sem eru að höndla þarna um þetta þrotabú Eyrarodda. Maður veltir því fyrir sér hvort þessi skiptastjóri sé hæfur til að fara með búið," segir

Guðmundur Björgvinsson, formaður íbúasamtaka Önundarfjarðar,

Þá segir hann það rannsóknarefni hvernig staðið var að málum.

„Þeir Lotnumenn eru hafðir að fíflum. (...) og Byggðastofnun og skiptastjóri vogi sér að fara svona með fólk, þetta er ljótur leikur sem þessir menn hafa gert af sér," segir Guðmundur.

Anna Kristín Gunnarsdóttir, stjórnarformaður Byggðastofnunar, hefur sagt ákvörðun stofnunarinnar tengjast viðskiptasögu eigenda Lotnu sem meðal annars snúa að brotum á fiskveiðilöggjöf. Í fréttum stöðvar 2 í gær sagði Sigurður Aðalsteinsson, einn stjórnenda Lotnu, að það lægi fyrir samþykki Byggðastofnunar um að Lotna myndi yfirtaka skuldir Eyrarodda og benti á samning því til stuðnings.

Þar stendur því orð gegn orði og á meðan ríkir aftur óvissa á Flateyri um framtíð þorpsins.