Danir koma Friðriki til varnar

Danir skiptast í tvo hópa gagnvart hegðun krónprinsins Friðriks í vikunni. Danska útgáfan af Séð og heyrt birti myndir af prinsinum á djamminu nokkrum dögum fyrir skírn tvíburanna hans og birtir á heimasíðu sinni myndband af verðandi kónginum dansa við föngulega blondínu undir þéttum takti "90 slagarans Rythm of the Night. Tvíburarnir voru skírðir í gær, strákurinn heitir Vincent en stúlkan Jósefína en kóngafólk frá Evrópu var viðstatt og Friðrik virtist hafa hrist grámyglulega þynnkuna af sér.

En það eru ekki allir Danir sem eru sáttir við fréttaflutning blaðsins Se og hør. Þeir telja að myndbandið sýni ekkert ósæmilegt og að blaðið hafi gert úlfalda úr mýflugu. „Flestir elska hversu alþýðuleg Friðrik og kona hans, Mary Donaldson, eru. Friðrik er á Facebook og hann fer út að skemmta sér með vinum sínum í Kaupmannahöfn. En nú fær hann þetta í bakið á sér,“ skrifar Karina Svensgaard hjá BT.

Besti vinur Friðriks, Jeppe Handwerk, segir í samtali við blaðið að fjölmiðlar hafi gert of mikið úr ljóskunni sem Friðrik sást vera kumpánlegur við. „Hún vinnur hjá mér og hún er vinur minn og konunnar minnar. Þau hafa hist nokkrum sinnum,“ segir Jeppe en hann er sá eini sem ekki er með blátt blóð í æðum og boðið er í skírnina.

Fjölmiðlar eru almennt sammála um að málið eigi eftir að auka vinsældir prinsins hjá helmingi þjóðarinnar, hinir eigi eftir að krefja hann um ábyrgari hegðun í framtíðinni. „Friðrik hefur náð að auka vinsældir dönsku konungsfjölskyldunnar með hegðun sinni en hann verður að gæta þess að verða ekki merktur sem partý-prinsinn,“ segir Lars Hovbakke Sørensen, sérfræðingur í konungsfjölskyldunni, í samtali við BT.- fgg