Brjálæðingur gengur laus

Annar þáttur af nýju seríunni af Steindanum okkar fór í loftið á Stöð 2 í gær. Eins og alltaf endaði þátturinn á tónlistarmyndbandi, sannkallaðri sprengju um furðulegan gaur sem kallar sig Altmuligtmand.

Í þættinum kölluðu Steindi og Ágúst Bent leikstjóri til sín fjöldan allan af aukaleikurum í frábærum atriðum, þeirra á meðal Þorstein Guðmundsson. Hann leikur erkióvin Altmuligmand í myndbandinu, harðgera og drykkfellda löggu sem hikar ekki við að skjóta til að leysa málið.

Danni Deluxxx gerði lagið við Altmuligtmand með Steinda. Þeir vinna vel saman en Danni gerði einnig lag í fyrstu seríu, hið óborganlega Newcastle United.

Kíkið líka á tónlistaratriðið úr fyrsta þætti, Djamm í kvöld. Það hefur væntanlega ekki farið framhjá lesendum Vísis en það er sló rækilega í gegn þegar það fór í loftið í síðustu viku. Enda er það langlífur klassíker sem upptökuteymið StopWaitGo gerði með Steinda. StopWaitGo sneru einnig tökkunum í Geðveikt fínn gaur í fyrra.

Við bíðum síðan spennt eftir næstu snilld frá Steinda. Þættirnir eru sýndir klukkan hálf níu á fimmtudagskvöldum en þeir verða alls átta talsins. Á meðan serían er sýnd á Stöð 2 birtast reglulega atriði með Steinda á Vísi, þeirra á meðal öll stóru tónlistaratriðin.