Svínaflensan kemur þegar líður á vetur

„Það má heita nokkuð víst að svínaflensan sé að taka völdin og að það verði hún sem kemur í vetur.“ Þetta segir Haraldur Briem sóttvarnalæknir. Senn verður boðið upp á hefðbundna flensusprautu fyrir veturinn.

„Við sjáum hver þróunin hefur verið á suðurhveli jarðar,“ útskýrir Haraldur. „Þar hefur svína­flensan haldið sig. En nú fer að vora þar og vetur að koma hjá okkur. Svínaflensan fylgir þeim breytingum og færir sig yfir á norðurhvelið. Hún hefur verið áberandi í Ástralíu, Nýja-Sjálandi og Suður-Ameríku. Við vitum ekki hvort gömlu stofnanir verða undir í flensufaraldri eða hvort þeir verða með í bland, þannig að bóluefnið sem verður í boði nú inniheldur bæði mótefnavaka fyrir þá og einnig fyrir svínaflensu.“

Rætt hefur verið um hugsan­legar aukaverkanir af bóluefni gegn svínaflensu, svo sem svokallaða drómasýki eða svefnsýki. Spurður um hvernig þeir eigi að haga málum sem vilji bólusetningu gegn gömlu flensustofnunum en ekki svínaflensu af einhverjum sökum segir Haraldur það erfitt um vik.

„Það verður ekki til neitt bóluefni sem ekki er með vaka fyrir svínaflensu,“ segir hann. „Þetta bóluefni sem notað var síðastliðinn vetur, einungis gegn svína­flensu, er með ónæmisglæði til að efla ónæmisvarnir. Menn hafa velt því fyrir sér hvort hann skipti einhverju máli varðandi aukaverkanir. Við teljum svo ekki vera.“ Haraldur segir að til séu í landinu um hundrað þúsund skammtar af bóluefni gegn svínaflensu.

„Við eigum þarna varabirgðir fyrir þá sem eru utan áhættuhópa, það er fólk undir sextugu, án undirliggjandi sjúkdóma. Ef faraldurinn í vetur verður slæmur þá munum við bjóða upp á slíka bólusetningu fyrir það fólk.“

Haraldur segir að verði þetta bóluefni ekki nýtt núna eða fram á árið 2012 þá verði ekki hægt að geyma það lengur. Fyrirsjáanlegt sé að ekki verði hægt að nota allar þær birgðir sem til eru, en verðmæti þeirra nemi um hunrdað milljónum króna.

„Það má horfa á þessar birgðir eins og tryggingagjald. Maður vonar að það kvikni ekki í húsinu, en við eigum þessa tryggingu ef illa fer. Ég hvet alla, einkum þó fólk í áhættuhópum til að láta bólusetja sig með því bóluefni sem boðið verður nú upp á í árlegu bólusetningunni. Ef við fáum slæman svínainflúensufaraldur mun ég hvetja hvern einasta mann, sem ekki hefur verið bólusettur, til þess að láta af því verða núna.“

jss@frettabladid.is