Hestapestin hefur greinst í manni

Sóttvarnalæknir hefur nú staðfest að hestapestin svokallaða hafi greinst í manni hérlendis. Hann segir að fjöldi fólks gæti verið sýktur af hestapestinni án þess að gera sér grein fyrir því.

Stór hluti íslenska hestastofnsins smitaðist í sumar af hvimleiðri sýkingu í öndunarfærum. Um svokallaða strepptókokkasýkingu er að ræða sem ekki er óalgeng í mönnum og getur valdið hálsbólgu, skarlatssótt og fleiri kvillum, en örveran sem leggst á hesta mun þó vera henni frábrugðin.

Fljótlega eftir að pestarinnar varð vart vöknuðu spurningar um hvort menn gætu smitast af hestapestinni. Nú hefur verið staðfest að svo sé, en Haraldur Briem, sóttvarnalæknir hjá Landlæknisembættinu, segist vita af einu slíku tilviki. Hann bendir þó á að ekki hafi kerfisbundið verið leitað að hestapestinni í mönnum.