Veggir með eyru frumflutt á morgun

Veggir með eyru, nýtt leikrit eftir Þorstein Guðmundsson, verður flutt í Útvarpsleikhúsinu á Rás 1 á sunnudaginn kl. 14. „Þetta er rólyndisleg kómedía sem fjallar um kellingu sem hefur það að starfa allan daginn að liggja á gólfinu og hlera parið á neðri hæðinni. Til hennar fer atvinnulaus strákur sem vill verða útvarpsmaður og gerir einskonar viðtal við hana. Hann fær að liggja með henni á gólfinu og hlusta.“

Þetta er fimmta verkið sem Útvarpsleikritið flytur eftir Þorstein, fyrir eru meðal annars Hugleiðingar dauðvona offitusjúklings og Fyndnasti maður Kópavogs. „Ég set mig ekki í neinar stellingar og þetta hafa allt verið gamanleikrit,“ segir hann.

Þorsteinn hefur verið að troða upp með Helga Svavari trommara. „Við höfum ekki ákveðið nafn á sveitina ennþá. Það gekk ekkert að auglýsa eftir nafni á Facebook. Það komu bara særandi nöfn eins og Stóri og litli og feiti, og við gátum ekki notað það. Ég er klára lokahandritið á kvikmyndinni Okkar eigin Osló sem Reynir Lyngdal leikstýrir í sumar. Við erum að fara að prófa leikara. Þetta er ljósblá klámmynd sem ég leik aðalhlutverkið í. Þetta er reyndar svona ástarmynd, en ég var hvattur til að öpgreita þetta í klámmynd. Maður verður að reyna að selja þetta.“

Með aðalhlutverkin í Veggir með eyru fara þau Þórunn Magnea Magnúsdóttir og Víkingur Kristjánsson, en Hjálmar Hjálmarsson er leikstjóri.- drg