„Peningar vaxa ekki á neinum trjám í Reykjavík“

Peningarnir vaxa ekki á trjánum í Reykjavík segir formaður velferðarráðs sem fyrr í vikunni felldi tillögu um að auka fjárhagsaðstoð til einstaklinga. Sveitarfélagið eigi ekki eitt og sér að glíma við fátæktina.

Neyðin í íslensku samfélagi er mikil og fjöldi fólks leitar til hjálparstofnanna í hverri viku. Í gær fengu ríflega 1200 manns matargjafir.

„Við viljum beita okkur til þess að forgangsröða fjármunum borgarinnar svo hægt sé að hækka fjárhagsaðstoðina," segir Björk Vilhelmsdóttir, formaður velferðarráðs. Hún segir að það kosti lágmark 150 milljónir á ári að hækka fjárhagsaðstoð upp að lágtekjumörkum. „Við getum ekki farið í það nema forgangsráða fjármunum því peningar vaxa ekki á neinum trjám í Reykjavík.

Björk segir að um 9% þeirra sem leita til hjálparsamtaka fái bætur frá sveitarfélögum. Hinir séu á framfæri ríkisins.

„Sveitarfélagið á ekki að taka eitt á þessum vanda. Stóri vandinn liggur í því hversu lágar þessar bætur eru. Það þarf samfélagslega sátt til að hækka þær."

Björk segir að kallað hafi verið eftir því að ríkisvaldið, sveitarfélögin og aðilar vinnumarkaðarins geri þetta að forgangsmáli. Að auki sé félagsmálaráðuneytið að vinna að því með háskólanum að skilgreina lágmarksframfærslu.