Formaður Bændasamtakanna fagnar nýju mjólkurfrumvarpi. Hann segir að mjólkursamlögum sé þegar bannað að taka við mjólk frá framleiðendum umfram kvóta til sölu. Nú sé verið að skerpa á löggjöfinni hvernig taka eigi á þeim sem brjóta lögin.
Haraldur Benediktsson, formaður Bændasamtakanna, segist fagna mjólkurfrumvarpi landbúnaðarráðherra. Þar sé verið að ýti undir nýsköpun og skerpa á löggjöf sem sé í gildi. Mjólkursamlögum sé þegar bannað að taka við mjólk frá framleiðendum umfram kvóta til sölu. En það voru ekki nein úrræði til að taka á þeim sem brutu lögin. Nú verði þeir sektaðir.
„Sem er mjög mikilvægt þannig að lög séu skýr. Gleymum því ekki að það eru margir búnir að fjárfesta verulega í landbúnaði. Sú fjárfesting er þá í mikilli óvissu ef ekki á að framkvæma lögin eins og þau hljóða."
Fleiri en MS kaupa og vinna úr mjólk
Haraldur segir að frumvarpinu sé ekki stefnt gegn þeim sem vilja vinna og selja mjólk. „Við viljum að það séu fleiri en færri mjólkurfyrirtæki sem markaðsetja mjólk á innanlandsmarkaði. Það mun stækka markaðinn og auka fjölbreytnina." Hann nefnir að það séu fleiri fyrirtæki en MS sem kaupi mjólk og vinni úr þeim.
Þá segir Haraldur að stóru tíðindin í frumvarpinu séu að það sé verið að ýta undir nýsköpun. En mjólkurframleiðanda verður heimilt að selja vörur sem samsvara 10 þúsund mjólkurlítrum án þess að það teljist til nýtingar á greiðslumarki lögbýlis, sem sé utan kvótakerfisins.
„Ég held það sé bara mjög fínt að leggja af stað þarna. Við höfum ekki mikla reynslu af þessu," segir Haraldur spurður hvort hann sé sáttur við þennan lítrafjölda.
Segir Samkeppniseftirlitið ganga of langt
Samkeppniseftirlitið gerir alvarlegar athugasemdir við frumvarpið og segir að íslenskur mjólkurmarkaður hafi mörg einkenni samráðshrings.
„Mér finnst mjög langt gengið þegar stjórnsýslustofnun eða embætti líkir atvinnugrein sem starfar innan laga sem Alþingi hefur sett nánast við glæpasamtök," segir Haraldur.
