Segir stjórn OR hafa skoðað niðurskurðartillögur

Hugmyndir um hagræðingu með skertu hlutfalli starfsfólks Orkuveitu Reykjavíkur (OR) hafa verið ræddar í stjórn fyrirtækisins sem og á tugum samráðsfunda samkvæmt áréttingu frá upplýsingafulltrúa Orkuveitunnar, Eiríki Hjálmarssyni.

Kjartan Magnússon, borgarfulltrúi Sjálfstæðisflokksins, óskaði í dag eftir aukafundi í stjórn fyrirtækisins vegna yfirvofandi fjöldauppsagna hjá OR.

Í tilkynningu frá flokknum kom fram að ástæðan væri sú að upplýsingar hafi borist að nokkrir trúnaðarmenn starfsmanna OR hafi fyrir nokkru kynnt stjórnendum fyrirtækisins tillögur sínar um hvernig komast megi hjá fjöldauppsögnum með því að ná fram verulegum sparnaði með starfshlutfallsskerðingu.

Þá sagði Kjartan það ámælisvert að umræddar tillögur hafi ekki verið kynntar fyrir stjórn fyrirtækisins.

Í tilkynningunni segir svo:

„Stjórnarmaður í OR tók upp á því í morgun að boða trúnaðarmenn hjá fyrirtækinu á sinn fund. Forstjóri OR kom óboðinn á þann fund ásamt innri endurskoðanda OR, enda fordæmalaust að einstakir stjórnarmenn boði til starfsmannafunda.

Á fundinum kom fram að þessar tilteknu hugmyndir hafa verið ræddar í stjórn OR. Þær voru gagnrýndar á fundinum í morgun."

Þá segir í tilkynningunni að Orkuveitan hafi samþykkt margvísislegar sparnaðaraðgerðir.