Leikskólastarfsfólk ósammála um trúboð

Skoðanir leikskólastarfsmanna á samstarfi við Þjóðkirkjuna eru afar mismunandi samkvæmt því sem kemur fram í skýrslu sem leik- og menntasvið borgarinnar vann um samstarfið.

„Persónulega finnst mér trúarfræðsla eiga að fara fram á heimili barnsins," segir einn starfsmaðurinn en í rannsókninni gafst þeim öllum færi á að bæta við svörum frá eigin brjósti auk þess að merka við á tilbúnum spurningalista.

„Við mættum vera duglegri að heimsækja kirkjuna," segir annar.

Sá þriðji tekur fram að kirkjan hafi boðið starfsfólki á námskeið einn laugardagsmorguninn og síðan upp á hádegisverð. „Þetta er til fyrirmyndar að mínu mati," segir hann í svari sínu í rannsókninni.

Enn einn lítur á trúarbrögð sem einkamál fólks og því eigi fræðsla um þau og innræting að vera í höndum foreldra. Þeir foreldrar sem kjósa að láta fræðsluna í hendur annarra geta hins vegar valið að senda börn sín í sunnudagaskóla eða annað kirkjustarf utan skóla.

Umrædd skýrsla liggur til grundvallar mótun samskiptareglna milli trúfélaga og skóla í borginni. Niðurstöður hennar voru birtar árið 2007.

Mannréttindaráð hefur nú lagt fram drög að ályktun um samskiptareglur á milli þessara aðila og eru drögin byggð á niðurstöðum skýrslunnar.

Prestar koma í meirihluta grunnskóla

Prestar Þjóðkirkjunnar heimsækja reglulega 63 prósent grunnskóla Reykjavíkurborgar. Rúm tíu prósent skólanna fá aðeins heimsókn frá prestum fyrir jólin, tæp þrjú prósenta aðeins fyrir jól og páska en helmingur grunnskólanna fá presta í heimsókn við hin ýmsu tilefni, meðal annars í tengslum við kristilegar hátíðir, fermingar eða áföll. Tæp 37 prósent grunnskóla fá aldrei heimsókn sóknarpresta.

Sóknarprestar heimsækja leikskóla borgarinnar öllu minna en tæp 67 prósent leikskóla fá aldrei heimsókn frá prestum Þjóðkirkjunnar. Þeir koma hins vegar mánaðarlega í rúm 17 prósent leikskólanna, fyrir jólin í 6 prósent þeirra en óreglulega í 8,6 prósent leikskóla.