Borgarfulltrúi biðst afsökunar

„Þetta voru mistök af minni hálfu. Ég ætlaði ekki að troða neinum um tær," segir Karl Sigurðsson, borgarfulltrúi Besta flokksins.

Í hádegisfréttum Bylgjunnar í dag var fjallað um tillögu sem fulltrúar Besta flokksins og Samfylkingarinnar lögðu fram í borgarráði fyrir helgi um að bjóða borgarbúum leikvelli til fósturs. Karl er formaður umhverfisráðs og sagði í hádegisfréttunum að hugmyndin gangi út á að áhugasamir

borgarbúar geti tekið að sér svæði eins og leikvelli í borginni. Borgarbúar sjái þá um viðhald og endurbætur með aðkomu borgarinnar í formi efniskostnaðar og leiðbeininga.

Í framhaldinu gagnrýndi Þorbjörg Helga Vigfúsdóttir, borgarfulltrúi Sjálfstæðisflokksins, Karl og sagði að tillagan væri í besta falli endurvinnsla. Þáverandi meirihluti hafi hafið þessa vinnu fyrir tveimur árum og að eigna ætti arkitektinum og Vesturbæingnum Ólafi Mathiesen hugmyndina.

Eftir að hafa lesið um viðbrögð Þorbjargar hafði Karl samband við fréttastofu og óskaði eftir því að koma afsökunarbeiðni á framfæri. „Ég gerði mér ekki grein fyrir því að hugmyndin væri þetta gömul. Ég biðst afsökunar á þessu."