Birgitta vill ekki blanda ESB saman við stjórnlagaþingskosningu

Birgitta Jónsdóttir, þingmaður Hreyfingarinnar, er hætt við að vera meðflutningsmaður tillögu sem lögð hefur verið fram á Alþingi um að kosið verði um að hætta aðildarviðræðum við Evrópusambandið samhliða því sem kosið verði til stjórnlagaþings.

„Mér finnst ekki við hæfi að blanda þessu saman," segir Birgitta í samtali við Vísi. Hún segir að spurningin um aðildarviðræður við Evrópusambandið sé mjög heitt mál sem megi ekki yfirskyggja kosningu um aðila á stjórnlagaþing. Það verði nógu erfitt fyrir þá 500, sem eru í framboði, að kynna sig þó svo að þessu máli sé ekki bætt við.

Birgitta segist vonast til að þeir aðilar sem verði kosnir á stjórnlagaþing verði þverskurður af þjóðinni. Hún segist samt hafa smá áhyggjur af því að það verði ekki nógu hátt hlutfall af landsbyggðinni.