Ræddu gagnrýni á Gylfa

Gylfi Magnússon efnahags- og viðskiptaráðherra og Jóhanna Sigurðardóttir forsætisráðherra ræddu saman í síma í kvöld um þá gagnrýni sem beinst hefur að Gylfa síðustu daga, að því er fram kemur á vef Morgunblaðsins. Gylfi hefur setið undir ámæli eftir að upplýst var að lögfræðiálit sem Lex lögmannsstofa vann fyrir Seðlabankann um lögmæti gengistryggðra lána var sent viðskiptaráðuneytinu.

Eins og fram kom í kvöldfréttum Stöðvar 2 ber forsætisráðherra enn traust til viðskiptaráðherra, en traust hennar er því skilyrði háð að hann geti gefið greinargóðar skýringar á ásökunum sem settar hafa verið fram á hendur honum vegna þessa máls. Gylfi hefur verið staddur úti á landi undanfarna daga en var væntanlegur til Reykjavíkur í dag eins og fram kom á Vísi.

Vísir hefur reynt að ná í Gylfa Magnússon og Benedikt Stefánsson aðstoðarmann hans í allt kvöld án árangurs. Ekki hefur heldur náðst í Hrannar Arnarsson, aðstoðarmann Jóhönnu Sigurðardóttur forsætisráðherra.