Enn verið að vinna í hljóðritunarmálinu

Hljóðritanir eru óheimilar á bæjarstjórnarfundum Mosfellsbæjar. Birta Jóhannesdóttir, þriðji maður á lista Íbúahreyfingarinnar, bað Karl Tómasson, forseta bæjarstjórnar, um leyfi til þess að hafa hljóðnema á bæjarstjórnarfundi 25. ágúst síðastliðinn, en var neitað.

Karl segir að verið sé að vinna að áætlun varðandi uppsetningu hljóðkerfis í fundarsal bæjarstjórnar. Varðandi þetta einstaka mál segir hann að fundirnir séu að sjálfsögðu opnir öllum en vildi ekki færa rök fyrir því hvers vegna Birtu var bannað að taka upp á síðasta fundi, sem var sá fyrsti eftir sumarfrí. Hann segir nauðsynlegt að draga einhvers konar mörk í þessum málum. „Ef fimm aðilar vilja allir koma með upptökutæki og skella á borðið hjá bæjarstjórn… einhvers staðar verða mörkin að vera,“ segir Karl. Hann segir að lögð hafi verið fram hugmynd að uppsetningu á hljóðritunarkerfi í salina á síðasta kjörtímabili. Verið sé að bíða eftir tilboði í verkið.

Fréttablaðið fjallaði um málið í byrjun júlí, en þá hafði verið tekið fyrir hljóðritun á öðrum fundi nýrrar bæjarstjórnar af hálfu forseta. Kom þá einnig fram að verið væri að vinna í málinu. - sv