Sundlaugin sögð vera óráðsía

Fulltrúar minnihluta S-lista Samfylkingarinnar í bæjarstjórn Blönduóss segja meirihluta L-listans leggja „blessun sína yfir stórfellda eyðslu umfram fjárheimildir“ með endurskoðun fjárhagsáætlunar fyrir árið 2010.

„Fulltrúar S-lista mótmæla þessari óráðsíu með skattfé íbúa sveitarfélagsins harðlega“, segir í bókun S-listans. „Framúrkeyrsla á einum framkvæmdalið um 130 milljónir króna (87 prósent) á átta mánuðum er algerlega ólíðandi og ætti að kalla á sérstaka rannsókn á þeim embættisfærslum sem að baki liggja,“ segja S-listafulltrúarnir. Er þar vísað til þess að á þessu ári hafi átt að verja 150 milljónum króna til að ljúka byggingu sundlaugar. Talan hafi endað í 280 milljónum.

„Þessi óráðsía, óvönduðu vinnubrögð og jafnvel í einhverjum tilvikum lögbrot í ráðstöfun fjármuna sveitarfélagsins lýsa virðingarleysi meirihlutans fyrir íbúum þess,“ segir S-listinn.

Ágúst Þór Bragason, fulltrúi L-listans, segir að við gerð fjárhags-áætlunar í fyrrahaust hafi menn ekki haft yfirsýn yfir kostnaðinn, meðal annars þar sem verið var að byggja við eldra hús og hönnunarvinnu ólokið. Talan 150 milljónir hafi þó verið sett í áætlunina.

„Síðan fjallaði bæjarstjórn um þetta á fundum á fyrri hluta ársins og tók ákvarðanir um búnað og annað sem var keypt.“ Ágúst minnir á að núverandi meirihluti hafi ekki tekið við fyrr en daginn áður en sundlaugin var opnuð um miðjan júní. Fyrri bæjarstjórn hafi staðið einhuga að framkvæmdunum. „Svo á að hengja nýkjörna fulltrúa. Mér finnst það ódýr málflutningur.“

Að sögn Ágústs gerði kostnaðar-áætlun á árinu 2008 ráð fyrir því að sundlaugin myndi í heild kosta 340 milljónir króna. Framreiknuð til dagsins í dag sé sú upphæð um 420 milljónir. Nú líti út fyrir að heildarkostnaður verði 490 til 500 milljónir. „Frávikið er 15 til 20 prósent frá því fyrir hrun. Það kalla ég ekki stórt frávik á svona stórri framkvæmd,“ segir Ágúst. - gar