Bíður tillagna forstöðumanna

„Það eru sívaxandi kröfur um ákveðna tækni og ákveðna færni og kunnáttu í læknis­þjónustu en það er ekki hægt að dreifa þessu um allt land heldur verður að koma henni fyrir á fáum stöðum, til dæmis höfuðborgarsvæðinu og Akureyri," segir Guðbjartur Hannesson heilbrigðisráðherra.

Hann segir niðurskurð á smærri heilbrigðisstofnunum afar erfiðan. Óskað hafi verið eftir tillögum frá forstöðumönnum og farið verði yfir niðurskurðaráformin í framhaldinu. Ekki megi gera lítið úr því að þetta sé mikið atvinnumál úti á landsbyggðinni.

Guðbjartur segir breytingar á fyrirhuguðum niðurskurði eins og að hræra í potti, eftir sem áður þurfi að skera niður um 4,8 milljarða í heilbrigðiskerfinu.

Guðbjartur segir að í niður­skurðar­tillögunum sé forgangs­raðað eins og gert hafi verið og áherslan á að byggja upp fá en öflug sjúkrahús og byggja upp heilsugæsluna til að taka við þeim málum sem hún geti ráðið við. Sérstaklega þurfi að efla heilsugæsluna á höfuðborgarsvæðinu, sem hafi ekki verið byggð jafn markvisst upp og á landsbyggðinni.

Fjölmennir borgarafundir voru víða um land í gær þar sem fyrirhuguðum niðurskurði var harðlega mótmælt.- bj / sjá síðu 2