Töluðu um launakjörin

Már Guðmundsson, seðlabankastjóri, og Jóhanna Sigurðardóttir, forsætisráðherra, ræddu um væntanleg launakjör Más í júní í fyrra áður en hann tók við sem seðlabankastjóri. Þetta kemur fram í tölvupóstsamskiptum Más við forsætisráðuneytið, sem Morgunblaðið hefur fengið aðgang að, að hluta og birt er á vef blaðsins.

Deilt hefur verið um það hvort starfsmenn forsætisráðuneytisins hafi gefið Má fyrirheit þegar hann var ráðinn á sínum tíma um að laun hans yrðu ekki skert í samræmi við stefnu ríkisstjórnarinnar. Lára V. Júlíusdóttir, formaður bankaráðs Seðlabankans, vísaði í þessi fyrirheit þegar hún lagði fram í síðasta mánuði þá tillögu í bankaráði Seðlabankans að laun bankastjóra yrðu hækkuð um 400 þúsund krónur. Hér greinir menn á því Jóhanna hefur vísað því á bug að hún eða starfsmenn ráðuneytisins hafi gefið slíkt loforð.

Samkvæmt frétt Mbl.is segir meðal annars í tölvubréfi Márs til Jóhönnu, dagsettu 21. júní 2009: „Opinber kjör fela auðvitað í sér mjög mikla tekjulækkun frá því sem ég bý við í núverandi starfi. Mér er einnig ljóst að til viðbótar gæti komið lækkun ráðstöfunartekna vegna almennra aðgerða stjórnvalda í skattamálum og því um líku."

Afrit af bréfinu var einnig sent á Láru og Ragnhildi Arnljótsdóttur, ráðuneytisstjóra í forsætisráðuneytinu. Samkvæmt fréttinni vísar Már í bréfinu íl fyrra samtal sitt við Jóhönnu.